ቢሮው አለም አቀፍ የጸረ ሙስና ቀንን በፓናል ውይት አከበረ
የአማራ ብሄራዊ ክልላዊ መንግስት ገንዘብ ቢሮ በአለም ለ22ኛ ፣በአገራችን ለ21ኛ ጊዜ " ትውልድን በሥነምግባር ፣ተቋምን በአሠራር" በሚል መሪ ሃሳብ የሚከበረውን አለም አቀፍ የጸረ ሙስና ቀንን በፓናል ውይት አከብሯል፡፡ በአብክመ ገንዘብ ቢሮ ም/ቢሮ ኃላፊ አቶ አደራጀው ካሴ በተሳታፊዎች ከተነሱት ጥያቄዎች በመነሳት እንደገለጹት የጸረ ሙስና ትግሉን የጸረ ሙስና ቀን በማክበር ብቻ ስለማይተገበር ሁላችንም ከተቋማችን ተግባርና ባህሪ አንጻር በማስተሳሰር እና ተከታታይ የሆነ ግንዛቤ በመፍጠር በዘርፉ ለውጥ ልናመጣ ይገባል ብለዋል፡፡ እንደተቋም የተዘረጉ የአሰራር ስርዓቶችን በማጠናከርና ቴክኖሎጅን በአግባቡ በመጠቀም፣ የአገልግሎት አሰጣጡን የበለጠ በማዘመን በተዋረድ ያሉ መዋቅሮቻችንን ጭምር ለዘርፉ ትኩረት ሰጥተው እንዲሰሩ አስፈላጊውን ድጋፍና ቁጥጥር ማድረግ እንደሚገባ የገለጹት ም/ቢሮ ኃላፊው አቶ አደራጀው የሙስና ትግሉን በማጠናከር የሙስና ተጋላጭነታችንን ማስቆም ይገባል ብለዋል፡፡ የሽህ ኪሎ ሜትር በአንድ እርምጃ እንደሚጀመር የገለጸት አቶ አደራጀው የሙስና ትግሉን ከወዲሁ በመጀመር ሙስናን ለመከላከል ሁላችንም በየድርሻችን ኃላፊነታችንን እንወጣ ሲሉ አሳስበዋል፡፡ በገንዘብ ቢሮ በም/ኤጀንሲ ኃላፊ ደረጃ የአለም አቀፍ ግዥ ዳይሬክቶሬት ዳይሬክተር አቶ አያሌው አዛለ በበኩላቸው የቀረበው ሰነድ ገላጭና አስተማሪ ነው በማለት ብዙዎቹ ነጥቦች ከኛ ተቋም አንጻር የሚመለከቱ ስለሆነ በእቅድ ይዘን የጸረ ሙስና ትግሉን በመቀላቀል በኃላፊነት የሁላችንም ድርሻ ከወዲሁ ወስደን መተግበርና ማስተግበር ይገባል ብለዋል፡፡ የሰነዱን የጥናት ግኝት መሰረት በማድረግ ሁላችንም የራሳችንን ድርሻ እና አስተዋጽኦ በማበርከት የተቋማት አስራሮችን የበለጠ በማዘመን ፣ህግን በማክበር እና በማስከበር እንደተቋም ለጸረ ሙስና ትግሉ የድርሻችንን እንወጣ ሲሉ አቶ አያሌው ጨምረው ገልጸዋል፡፡ በተቋሙ የስነ ምግባር መኮነን ወ/ሮ ጸሃይነሽ ሙሉ በኩል የቀረበውን ሰነድ የተለያዩ አሰተያየቶችና ጥያቄዎች ቀርበው ሰፊ ውይይት እና ማብራሪያ ተሰጥቶበት የፓናል ውይይቱ ተጠናቋል፡፡