በአዲሱ የግዥና ንብረት አስተዳደር መመሪያ ስልጠና
የአማራ ብሔራዊ ክልላዊ መንግስት ገንዘብ ቢሮ የመንግስት ግዥና ንብረት አስተዳደር ዳይሬክቶሬት በአዲሱ የመንግስት ግዥና ንብረት አስተዳደር አፈፃፀም መመሪያ ዙሪያ ለክልል ተቋማት የግዥ ዳይሬክተሮች፣ ቡድን መሪዎችና ባለሙያዎች ስልጠና እየሰጠ ይገኛል፡፡ በስልጠና መድረኩ የተገኙት የአብክመ ገንዘብ ቢሮ ምክትል ኃላፊ አቶ አደራጀው ካሴ ለክልላችን የኢኮኖሚ እድገትና የልማት ግቦች መሳካት ትልቅ ሃላፊነት ወስዳችሁ ለምትሰሩ የግዥ ዘርፍ አስተባባሪዎችና ባለሙያዎች አዲሱ የመንግስት ግዥና ንብረት አስተዳደር መመሪያ ስልጠና መስጠት አስፈላጊ መሆኑን ገልፀው በአለፉት 15 አመታት በክልላችን ሲሰራበት የቆየው የመንግስት ግዥና ንብረት አስተዳደር አዋጅ ቁጥር 179/2003 በመተካት በአዋጅ ቁጥር 306/2018 ዓ.ም የፀደቀ ሲሆን ይህንኑ አዋጅ ተከትሎ የወጣውን የመንግስት ግዥና ንብረት አስተዳደር መመሪያ ከ2019 በጀት አመት ጀምሮ ተግባራዊ እንደሚሆን ገልፀዋል፡፡ አዲሱ የመንግስት ግዥና ንብረት አስተዳደር መመሪያ በርካታ ማሻሻያዎች ተደርገውበት እንደፀደቀ የገለፁት ም/ቢሮ ሃላፊው አቶ አደራጀው ከአገሪቱ የኢኮኖሚ አድገት፣ የመግዛት አቅም ለውጥ እንዲሁም አለምአቀፋዊ ሁኔታዎችን ያገናዘበ እና ከቴክኖሎጅ እድገት ጋር የተጣጣመ አሰራር ተግባራዊ ለማድረግ እንዲያስች ተደርጐ የተዘጋጀ መመሪያ መሆኑን ገልፀዋል፡፡ ከዚህ ስልጠና ሁላችንም ራሳችንን በማብቃትና ለሌሎች ባለሙያዎች ግንዛቤ በመስጠት እንደተቋም ከወዲሁ የተደራጀ እቅድ በማቀድ የግዥና ንብረት አስተዳደር ስራዎችን በማዘመንና ዲጂታላይዝ በማድረግ በኤሌክትሮኒክስ የግዥ ስርዓት መተግበር፣ አዋጁ ሲሻሻል የተጠያቂነት ስርአትንም አብሮ እንዲተገበር ተደርጐ ስለተዘጋጀ ተጠያቂነትን ማስፈንና የህግ ማስከበር ስራን በመስራት፣ ግዥዎችን ስንፈጽም የህይወት ዘመን ወጭ ትንተናና የአካባቢ ጥበቃን ታሳቢ ያደረገ ግዥ በመፈፀም መስራት እንደሚገባና በመጨረሻም የአገር ውስጥ አምራቾችን እና የስራ እድል ፈጠራን የሚያበረታታ የግዥ ስርዓት በመከተል እንዲሁም የሰነዶች አያያዝና ውል አስተዳደር ስራን በማጠናከር የግዥ ስራዎቻችንን በዚህ ልክ አስበን ለመተግበር ከወዲሁ መዘጋጀት እንደሚገባም ም/ቢሮ ኃላፊው ጨምረው ገልፀዋል፡፡ እያንዳንዱ ግዥ ፈፃሚ ተቋም ግዥዎችን ሲፈጽም መረጃዎችን በሃርድና በሶፍት ኮፒ/ዲጂታላይዝ/ መረጃ በማደራጀት መያዝ አለበት ያሉት አቶ አደራጀው የፍትህ ዘርፉም በውል አስተዳደር ስርዓት ዙሪያ የግዥ ስራዎችን እንዴት መደገፍ እንዳለበት በዚህ መድረክ ውይይት የሚደረግበት ይሆናል ብለዋል፡፡ በቀጣይም 4030 ለሚሆኑ ዞን፣ ታች ወረዳና ከተሞች ድረስ ለሚገኙ የግዥና ንብረት አስተዳደር ፈፃሚ ባለሙያዎች ተመሳሳይ ስልጠናዎች እንደሚሰጡም በመድረኩ ተገልጿል፡፡ ፌስቡክ https://www.facebook.com/share/191YyDU2YK/ ዩቲዩብ http://www.youtube.com/@AmharaFinanceBureau ቴሌግራም https://t.me/AmharaBureauofFinance ዋትስአፕ https://whatsapp.com/channel/0029Vb8BHKA4SpkAKHBs6M0H ኢንስታግራም https://www.instagram.com/amhara415?igsh=MTh1Nzd3dnNpaWRxMg== ቲክቶክ https://www.tiktok.com/@amhara.finance.bureau?_r=1... ዌብሳይት http://www.amharabofec.gov.com/ ኤክስ (ትዊተር) https://twitter.com/@amhara_finance