በመንግስት ግዥ ረቂቅ መመሪያ ላይ የግብአት ማሰባሰብ ውይይት ተካሄደ
የአማራ ክልል ገንዘብ ቢሮ ረቂቅ ግዥ መመሪያው ዙሪያ ግብአት ለመሰብሰብ ከአጋር አካላት ጋር ውይይት አካሄደ፡፡ በውይይት መድረኩ የተገኙት የአብክመ ገንዘብ ቢሮ ም/ኃላፊ አቶ አደራጀው ካሴ የግዥ መመሪያውን ማሻሻል ያስፈለገበት ከዚህ በፊት የነበረው መመሪያ ለረጅም ጊዜ የቆየ ከመሆኑም ባሻገር አሁን ካለው የኢኮኖሚ እድገት እና የገንዘብ የመግዛት አቅምን ታሳቢ ያደረገ ነው ብለዋል፡፡ በዚህ የግብአት ማሰባሰቢያ ውይይት የተሰጠው ሙያዊ ግብዓት በጣም ጥሩ ነው ያሉት ም/ቢሮ ኃላፊው አቶ አደራጀው የምናወጣው መመሪያ ውጤታማ እና የተዋጣለት እንዲሆን ሁሉም ባለድርሻ አካላት ግብዓት ከመስጠት ባለፈ አማራጮችን ጭምር በማመላከት በተለይም ደግሞ ከፋይናንስ ዘርፍ የሚጠበቅ መሆኑን ገልፀዋል፡፡ ይህንን መመሪያ ለማሻሻል በቢሮ ደረጃ እና የቋሚ ኮሚቴዎችን ባሳተፈ አግባብ ሰፊ ስራ ተሰርቷል ያሉት አቶ አደራጀው አሁንም የፋይናንስ ተቋማትን በዋናነት በማሳተፍ ከሌሎች ባለድርሻ አካላት ጋር አስፈላጊውን ግብዓት በማሰባሰብ የተዋጣለት መመሪያ ሆኖ እንዲዘጋጅ እየሰራን ነው ብለዋል፡፡ ቀጣይም አሉ ም/ቢሮ ኃላፊው ሁሉንም የቴክኖሎጅ አማራጮች በመጠቀም ተጨማሪ ግብአት መስጠት እንደሚገባ ገልፀው ከዛሬ ጀምሮ የተሰጠውን ግብዓት የማደራጀትና የመተንተን ስራ እንደሚሰራም አስታውቀዋል፡፡ አቶ አደራጀው አክለውም ከመመሪያው ጋር አብረው የማይሄዱ እንዲሁም ከህግና አሰራር ፣ ከአዋጁ፣ ከፖሊሲው እና ከሌሎች ህጐች አንፃርም በደንብ ታይተው ረቂቁን በማሻሻልና በመጨረሻም በፍትህ አካላት ታይቶና ተመዝግቦ መመሪያ ሆኖ ይወጣል ብለዋል፡፡ ይህንን መመሪያ ተከትሎ ሌሎች መመሪያዎች በተለይም ቀላል የወረዳና የቀበሌ የግዥ መመሪያ እንዲሁም የህጋዊነት ኦዲት መመሪያና የመሳሰሉት የሚዘጋጁበት ሁኔታ እንደሚኖርም አቶ አደራጀው ጨምረው ገልፀዋል፡፡ የገንዘብ ቢሮ የቻናል አንድ ፕሮግራሞች ተወካይ አስተባባሪና የPFM ፕሮግራም አስተባባሪ ወ/ሮ ሲሃም ወርቁ በበኩላቸው ለዚህ መመሪያ በአጭር ጊዜ በዚህ ልክ የተሰጠው ግብአት ይበል የሚያስብል ነው በማለት ግዥ በባህሪው ውስብስብ ከመሆኑ ጋር ተያይዞ የከተማ ግዥን ጨምሮ በአግባቡ ማየትና ይህ መመሪያ ሁሉንም ባለድርሻ አካላት እና የህብረተሰብ ክፍል ያሳተፈ እና ውጤታማ መመሪያ ሆኖ ሊዘጋጅ እንደሚገባም አሳስበዋል፡፡ የግዥ ስራችን ቀጣይ ወደ ኤሌክትሮኒክስ የግዥ ሰርአት እንደሚሸጋገርም ወ/ሮ ሲሃም ጨምረው ገልፀዋል፡፡