ጠንካራ ውጤታማ የሆነ ተቋምና ፈፃሚ መገንባት ይገባል //የአብክመ ገንዘብ ቢሮ
የአማራ ብሔራዊ ክልላዊ መንግስት ገንዘብ ቢሮ አዲሱን የመንግስት ግዥ እና ንብረት አስተዳደር መመሪያዎች በተመረጡ 10 ማዕከላት ለዞን፣ ለሪጅኦፖሊታን ከተሞች እና ወረዳዎች ለሚሰሩ አመራሮች፣ የግዥ ቡድን መሪዎች እና ባለሙያዎች ስልጠና ሰጥቷል፡፡ በስልጠናው ማጠቃለያ በባህር ዳር የስልጠና ማዕከል ተገኝተው በዙም ሚቲንግ ለ10ሩም ማዕከላት የማጠቃለያ ንግግር ያደረጉት የአብክመ ገንዘብ ቢሮ ኃላፊ አቶ አታላይ ጥላሁን እንደገለፁት ስልጠናው ለተከታታይ 7 ቀናት በ10 ማዕከላት ሲሰጥ እንደቆየ ገልፀው ከአሁን በፊት ለ15 አመታት ሲሰራበት የቆየው የግዥ መመሪያ በየጊዜው በበራሪ ወረቀቶች ማስተካከያዎች እየተደረጉበት ሲሰራበት የነበረ ቢሆንም ብዙ የአሰራር ክፍተቶች እንደታዩበትና ይህንን አሰራር ለማስተካከል ረጅም ጊዜ የወሰደ ከክልል እስከታች ወረዳ ድረስ ሁሉም አካላትና ሌሎች አጋርና ባለድርሻ አካላት ሁሉ ግብአት የሰጡበትና ደረጃውን የጠበቀ ሊያሰራና ለውጥ ሊያመጣ የሚችል የመንግስት ግዥ እና ንብረት አስተዳደር አዋጅ ቁጥር 306/2018 ዓ.ም እና እሱን ተከትሎ የወጡ የመንግስት ግዥ አፈፃፀም መመሪያ 144/2018፣ የንብረት አስተዳደር መመሪያ 145/2018 እና ሌሎች ስተንዳርዶች እንደወጡና በነዚህ ላይ ስልጠናዎች እየተሰጡ እንደሆነ ተናግረዋል፡፡ ኃላፊው አቶ አታላይ አያይዘውም የመንግስት ከፍተኛው ሃብት ወይም ከ60 እስከ 70 የሚሆነው በጀት ግዥ ላይ እንደሚውል ገልፀው ይህንን ለመፈፀም መመሪያዎች መዘጋጀታቸውን ያወሱት ኃላፊው መመሪያ መዘጋጀቱ የሪፎርም ስራ አንዱ አካል እንደሆነ እና ነገር ግን መመሪያ ማዘጋጀት ብቻ ግብአት እንዳልሆነና ይህንን መመሪያ ሊያስፈጽሙ የሚችሉ ጠንካራ ተቋም ግንባታና እያንዳንዱ ሀብት ለታለመለት አላማ እንዲውልና ወጭ ቆጣቢ በሆነ መንገድ ህግን ተከትሎ የሚፈጽም ብቁ የሰው ሃይል መፍጠርና ጠንካራ የቁጥጥር ስርአት መዘርጋት አስፈላጊ እንደሆነ ገልፀዋል፡፡ አዲሱ መመሪያ ከወጣ ለ3ኛ ዙር ስልጠና እየተሰጠ እንደሆነ የገለፁት አቶ አታላይ በቀጣይ 4030 ለሚሆኑ ሰልጣኞችም ስልጠና እንደሚሰጥ ገልፀዋል፡፡ ህግን ማሳወቅና ማስፈፀም አጣምረን በመስራት መመሪያን ባለማወቅ የሚጠየቅ እንዳይኖር ማድረግ፣ የሙያ ብቃትን ማረጋገጥ፣ ዲጂታላይዝ የሆነና የመረጃ ስርአታችን ቴክኖሎጅን በመጠቀም መተግበር፣ ንብረትን በአግባቡ ማስተዳደር እንደግዥ ሁሉ ንብረት ላይ በትኩረት መስራት፣ የተጠያቂነት ስርአት መዘርጋትና ባለቤት ሆነው እንዲሰሩ ኃላፊነት መስጠት እንደሚገባ ጨምረው ገልፀዋል፡፡ ሰልጣኞች ከዚህ ስልጠና መልስ እስከ ታች ወረዳና ቀበሌ ድረስ አጭር ስልጠና እንዲሰጡ፣ የሚነሱ ሃሳቦችን በአግባቡ በማደራጀትና በመያዝ መፍትሔ እንዲሰጣቸው እንዲደረጉ፣ የሰልጣኞችን መረጃ እንዲይዙና ጠንካራ ተቋም ለመገንባት ውጤት የሚያመጣ ተጽእኖ ፈጣሪ ባለሙያ ለመፍጠር ሁላችንም የበኩላችንን ኃላፊነት ወስደን በተግባር ውጤት የሚያመጣ ስራ መስራት አለብን ሲሉ አቶ አታላይ አቅጣጫ ሰጥተው ስልጠናውን አጠቃለዋል፡፡ ተጨማሪ መረጃዎችን ከገንዘብ ቢሮ ለማግኘት የሚከተሉትን ሊንኮች ይጠቀሙ ፌስቡክ https://www.facebook.com/share/191YyDU2YK/ ዩቲዩብ http://www.youtube.com/@AmharaFinanceBureau ቴሌግራም https://t.me/AmharaBureauofFinance ዋትስአፕ https://whatsapp.com/channel/0029Vb8BHKA4SpkAKHBs6M0H ኢንስታግራም https://www.instagram.com/amhara415?igsh=MTh1Nzd3dnNpaWRxMg== ቲክቶክ https://www.tiktok.com/@amhara.finance.bureau?_r=1... ዌብሳይት http://www.amharabofec.gov.com/ ኤክስ (ትዊተር) https://twitter.com/@amhara_finance