የልማት አጋሮች ጎደሎ የሚሞሉ ብቻ ሳይኾኑ ለእውቀት እና ለቴክኖሎጂ ሽግግር ተሳትፏቸው የጎላ ነው።
ባሕር ዳር: ታኅሣሥ 08/2018 ዓ.ም (አሚኮ) የአማራ ክልል መንግሥት እና ወርልድ ቪዥን ኢትዮጵያ በቀጣይ አምስት ዓመታት የሚተገበር የልማት መርሐ ግብር ስምምነት ተፈራርመዋል። በፊርማ ሥነ ሥርዓቱ ላይ የተገኙት የአማራ ክልል ገንዘብ ቢሮ ኀላፊ አታላይ ጥላሁን የልማት አጋሮች በክልሉ ውስጥ በልማት፣ በሰላም፣ በዴሞክራሲ ግንባታ እና በአስቸኳይ ጊዜ ድጋፍ እንዲሳተፉ ምቹ ሁኔታዎች መፈጠሩን አብራርተዋል። በተለይም የልማት አጋሮች የፕሮጀክት ሀሳባቸውን ይዘው ወደ ክልሉ ሲመጡ ከክልሉ ፍላጎት ጋር ተጣጥመው እንዲሄዱ የሚያስችሉ አሠራሮች ተዘርግተዋል ነው ያሉት። የወርልድ ቪዥን ኢትዮጵያ በክልሉ ከአሁን በፊትም በጤና፣ በትምህርት፣ በንጹህ መጠጥ ውኃ፣ በጾታ እኩልነት፣ በአካባቢ ጥበቃ፣ በግብርና፣ በእንስሳት ሀብት ልማት እና በሰላም ግንባታ ዘርፎች ትኩረት አድርገው ሲሠሩ መቆየታቸውን አንስተዋል። በዚህም በርካታ ለውጦች መጥተዋል ነው ያሉት። ልማት የሁሉንም ተሳትፎ የሚጠይቅ ነው ያሉት ቢሮ ኀላፊው የልማት አጋሮች ጎደሎ የሚሞሉ ብቻ ሳይኾኑ የእውቀት እና የቴክኖሎጂ ሽግግር በማድረግ በሰው ኀይል ግንባታ እና የማኅበራዊ መሠረተ ልማቶችን በማገዝ በኩል ተሳትፏቸው የጎላ ነው ብለዋል። ዛሬ የተፈረመው የትብብር ስምምነትም እስከ ታች ድረስ ውጤታማ ለማድረግ መግባባት ላይ የተደረሠበት ነው ብለዋል። ከሚመለከታቸው ተቋማት ጋርም የጋራ የተደረገበት ስለመኾኑም ነው የጠቆሙት። በወርልድ ቪዥን ኢትዮጵያ የአማራ ክልል ፕሮግራም አስተባባሪ ቴዎድሮስ አባተ ስምምነቱ በክልሉ ከ2 ነጥብ 8 ሚሊዮን በላይ የሚኾኑ የማኅበረሰብ ክፍሎችን በቀጥታ ተጠቃሚ ያደርጋል ብለዋል። መርሐ ግብሩን በውጤታማነት ተግባራዊ ለማድረግ መንግሥት ምቹ ሁኔታዎችን በመፍጠር በአጋርነት መሥራት እንደሚገባ አንስተዋል። በተለይም መርሐ ግብሩ በሚፈጸምባቸው ወረዳዎች ማኅበረሰቡን በማንቀሳቀስ በትብብር መሥራት ይጠበቃል ነው ያሉት። የልማቱ ተጠቃሚው ማኅበረሰብም በንቃት በመሳተፍ በባለቤትነት መተባበር እንደሚያስፈልግ ጠቁመዋል። የወርልድ ቪዥን ኢትዮጵያ ብሔራዊ ዳይሬክተር ካርመን ቲል በአማራ ክልል በሰብአዊ እና በማኅበራዊ ልማት እየተሳተፉ እንደሚገኙ ጠቁመዋል። ዛሬ ከክልሉ መንግሥት ጋር የተደረገው የመግባቢያ ስምምነት በሕጻናት ጥበቃ፣ በሥነ ምግብ እና በትምህርት ላይ በዋናነት ያተኮረ ነው ብለዋል። ይህ ደግም ከሰብዓዊ ድጋፍ ባለፈ ማኅበረሰቡን በዘላቂነት በማጠናከር የተሻለ ሕይወት እንዲኖራቸው የሚያስችል ሥራ ይሠራል ነው ያሉት። ተፈጻሚ በሚኾኑት ዝርዝር ፕሮጀክቶችም ከሚመለከታቸው ቢሮዎች ጋር የጋራ ስምምነት በማድረግ ወደ ተግባር እንደሚገባ ጠቁመዋል።