የማዕቀፍና አለምአቀፍ ግዥዎች ከፍተኛ ኢኮኖሚያዊ ጠቀሜታ እንዳላቸውና በእውቀት ሊመሩ እንደሚገባ ተገለፀ
የማዕቀፍና አለምአቀፍ ግዥ ተቋማት የሚጠይቁትን ተመሳሳይ ፍላጐቶች/ግዥዎች በመሰብሰብና በማደራጀት በተጠቃለለ ሁኔታ በክልሉ በሁሉም ዞንና ወረዳዎች የጥቅል ግዥ የሚፈጽም የስራ ክፍል እንደሆነ ተገለፀ፡፡ በአብክመ ገንዘብ ቢሮ በምክትል ኤጀንሲ ኃላፊ ደረጃ የማዕቀፍና አለምአቀፍ ግዥ ዳይሬክቶሬት ዳይሬክተር አቶ አያሌው አዛለ የማዕቀፍ ግዥ በፌዴራል ደረጃ በአዋጅ ቁጥር 649/2009 አንቀጽ 59 ላይ እና በአማራ ክልል ደግሞ በአዋጅ ቁጥር179/2003 አንቀጽ 48 መሠረት የማዕቀፍ ግዥ እንዲከናወን መንግስት እንደሚፈቅድ ገልፀዋል፡፡ አቶ አያሌው አዛለ አክለውም በየአመቱ ከሚመደበው በጀት ከ65 አስከ 70 ፐርሰንት የሚሆነው ለግዥ እንደሚውል ገልፀው፤ ይህንን ግዥ በእውቀትና በስርዓት መምራት የግድ ስለሆነ የማእቀፍና አለማቀፍ ግዥ በፌዴራልና በክልል ደረጃ እየተተገበረ ይገኛል ብለዋል፡፡ በክልላችን በማዕቀፍ ግዥ የሚፈፀሙ የተሽከርካሪ ጥገና አገልግሎት፣ ተሽከርካሪ ግዥ፣ የመድን አገልግሎት፣ የኤሌክትሮኒክስ መሳሪያዎች ግዥ፣ የወረቀት ግዥ፣ የመድን ዋስትና ግዥ የክልሉ መንግስት ውክልና በሰጠው በአብክመ ገንዘብ ቢሮ በማዕቀፍና አለማቀፍ ግዥ ክፍል የሚፈፀም ተግባር መሆኑንና አጠቃላይ የግዥ ሂደቱንም የዘርፉ ባለሙያዎች ለግዥ ጠያቂዎች ድጋፍና ክትትል በማድረግ አፈፃፀሙን እንደሚከታተሉ አቶ አያሌው ጨምረው ገልፀዋል፡፡ የማዕቀፍና አለማቀፍ ግዥ ከፍተኛ የኢኮኖሚያዊ ጠቀሜታ ያላቸውና ከፍተኛ ወጭና እውቀትን የሚጠይቁ መሆኑና ግዥውም በገሃር ውስጥ ብቻ ሳይሆን በውጭ ሃገራትም ጭምር የሚፈፀም መሆኑን የገለፁት አቶ አያሌው ግዥው ተፈጽሞ እስከ ርክክብ ስራው በዚሁ በማዕቀፍና አለማቀፍ በኩል የሚፈፀም እንደሆነ አንስተዋል፡፡ በመጨረሻም ከተገዙ ንብረቶች ጋር ተያይዞ ተጠቃሚዎች ለሚገጥሟቸው ችግሮች እየተከታተሉ መፍትሔዎችን እንደሚሰጡና እንደሚደግፉም ተናግረዋል፡፡