በረቂቅ አዋጁ ላይ ብዙ ግብዓቶች ተገኝተዋል // ወ/ሮ ፋንቱ ተስፋዬ የአማራ ክልል ም/ቤት አፈ ጉባኤ
የአማራ ክልል ገንዘብ ቢሮ በመንግስት ግዥና ንብረት አስተዳደር ረቂቅ አዋጅ ዙሪያ ከሚመለከታቸው ባለድርሻ አካላት ጋር የምክክር መድረክ አካሄደ፡፡ በምክክር መድረኩ ላይ የተገኙት የአማራ ክልል ምክር ቤት አፈ ጉባኤ የተከበሩ ወ/ሮ ፋንቱ ተስፋዬ በመንግስት ግዥና ንብረት አስተዳደር ረቂቅ አዋጅ ላይ ከባለድርሻ አካላት ጋር ውይይት መደረጉ ተገቢ መሁኑን ገልጸው የረቂቅ አዋጁን የሚያዳብሩና ጠቃሚ የሆኑ ግብዓቶች የተገኙ መሆናቸውን ገልጸዋል፡፡ አፈ ጉባኤዋ አክለውም አዋጁ ወቅቱን የዋጀና ጥራቱን የጠበቀ ሆኖ መዘጋጀት ያለበት በመሆኑ እንደዚህ አይነት ከባለድርሻ አካላት ጋር የሚደረጉ ውይይቶች ጠቃሚ መሆናቸውን ገልጸው ለቀጣይም ተጠናክሮ መቀጠል የሚገባው መሆኑን አስገንዝበዋል የአማራ ክልል ገንዘብ ቢሮ ኃላፊ አቶ አታላይ ጥላሁን በበኩላቸው በረቂቅ አዋጁ ላይ ከባለድርሻ አካላት ጋር የተደረገው ውይይት ረቂቅ አዋጁን ለማዳበር የሚያግዙ ሃሳቦችን ያገኝንበትና ጠቃሚ የምክክር መድረክ መሆኑን ገልጸው ከተሳታፊዎች ለተነሱት ግልጸኝነት ለሚሹ ጉዳዮች ማብራሪያ ሰጥተዋል፡፡ የመንግስት ግዥና ንብረት አስተዳደር ረቂቅ አዋጁን ያቀረቡት የገንዘብ ቢሮ ም/ቢሮ ኃላፊ አቶ አደራጀው ካሴ አዋጁን ማሻሻል ያስፈለገበት ምክንያት አዋጁ ለረጂም ጊዜ የቆየና በቆይታ ሂደቱም ብዙ ችግሮች እየገጠሙት የነበረ ከመሆኑ ጋር ተያይዞ ችግሮችን ለመፍታት እና ከፌደራል መንግስት የግዥና ንብረት እተዳደር አዋጁ ጋር የተናበበ እንዲሆን በማስፈለጉም ነው ብለዋል፡፡ በውይይት መድረኩ ላይ የአማራ ክልል ምክር ቤት አፈ ጉባኤ የተከበሩ ወ/ሮ ፋንቱ ተስፋዬ፣ የአማራ ክልል ምክር ቤት ም/አፈ ጉባኤ የተከበሩ አቶ አማረ ሰጤ፣ የክልል ም/ቤት የተለያዩ ቋሚ ኮሚቴ ሰብሳቢዎች፣የሚመለከታቸው የክልል ቢሮ ኃላፊዎችና ም/ኃላፊዎች እንዲሁም ባለሙያዎች ተሳታፊ ሆነዋል፡፡